روژا ئێکشەمبی، ١ کانینا ئێکێ ٢٠٢٤ ، روژەکا پڕ بزاڤ بو ژلایێ کولیژا پزیشکى ڤێترنەرى ڤە ب هەمی پشکێن خو ڤە ، چاڵاکیێن جودا جودا هاتنە رێکخستن ویا ژ هەمیان دیارتر دەستپێشخەریا لیژنا یەکێتیا قوتابیان ب هەفکاری دگەل راگریا کولیژێ. ئەڤ چاڵاکیە پێکهات بو ژ چاندنا چەندین جورێن دار و گولان ل حەوشا بەرامبەر ئاڤاهیێ رێڤەبەریا کولیژێ ب بەشداریا چالاکانە یا قوتابیان ل ژێر سەرپەرشتیا راستەوخو یا رێڤەبەریا کولیژێ. راگرێ کولیژێ بەشداربو د چاڵاکیا خوێندکاران دا و رابو ب چاندنا دار وگولان دگەل وان و گرنگیا هەفکاریێ دناڤبەرا راگریا کولیژێ و خوێندکاران دیار کر.

ئەڤ جورە چاڵاکیێن جڤاکی هاریکارن بو پەیداکرنا سەقایەک پوزیتیف و شاد دناڤا کولیژێ دا، دیسان کاریگەریا خو ل سەر بارێ تەندروستێ دەروونی یێ قوتابیان هەیە و هاریکارن بو پێشڤەبرنا شیانێن کومەلایەتیێن قوتابییان.

هژمارەک ژ قوتابیان شیان خو دیار کەن د دروستکرنا هەفکارییان د ناڤبەرا لایانێن پەیوەندیدار، و دڤی چارچوڤەیدا بزاڤێن کومیتەیا ئێکەتیا قوتابیان ب سەروکاتیا زانیار دیار سعید ژهەژی رێزلێنانەک تایبەتە.

دماوێ ڤێ هەوێدا هزرەک هاتە پێشنیار کرن کو قوتابی چاڤدێریا ڤان روەکێن هاتینە چاندن بستویێ خو ڤە گرێدەن. و هەر روەکەک ب ناڤێ قوتابیەکى بهێتە نافکرن. پشتی دەرچوونێ بەرپرسایەتیا ڤان روەکان دێ دەنە وان قوتابیێن نوی ب مەبەستێ گرێدانا وان بگەشەپێدانا کولیژێ و ژینگەهێ ڤە.

ئەڤ جورە دەستپێشخەریە رەنگڤەدانا کریارێن ب کومە ژبو باشترکرنا ژینگەها کولیژێ و ب هێزکرنا هەفکاریێ دناڤبەرا هەمی لایانان.

پەیمان فخري