هاتنا حالەتان بۆ کلینیکێن سەر ب کۆلیژا نۆشداریا ڤێتێرنەری ڤە یا بەردەوامە، کو هندەک ژ وان بۆ ڕاوێژکاریێن نۆشداری نە و هندەکێن دی ژی بۆ وەرگرتنا چارەسەریا ناڤخۆیی (هەناوی) یان نەشتەرگەریێ نە.

د حەفتیا بۆری دا، مە چەندین حالەتێن برینداربوون و شینبوونێن کوور ل دەڤ جۆرەها ئاژەلان تۆمارکرینە، کو ژ ئەنجامێ ڕوودانێن ژنیشکێڤە د چالاکیێن وان یێن ڕۆژانە دا پەیدا بووینە، هەروەسا هندەک حالەت ژی ژ ئەنجامێ شەڕکرنێ د ناڤبەرا ئاژەلان ب خۆ دا دروست بووینە، کو ئەڤە ژی ب غەریزەیا وان یا سروشتی ڤە گرێدایی یە.

پڕۆفیسۆرا هاریکار دکتۆر (مریەم ئیبراهیم یاسین) ل پشکا نۆشداریا هەناوی و نەشتەرگەریێ، سەرپەرشتیا کۆمەکا قوتابیان کر کو ب شێوەیەکێ کرداری (پراکتیکی) هەمی ڕێکارێن گرێدایی پڕۆتۆکۆلێ چارەسەرکرنا برینان بجهئینان، زێدەباری پێدانا دەرمانان و وەرگرتنا ڕێکارێن پێدڤی بۆ خۆپاراستن ژ هەودانێن (ئیلتیهاباتێن) بەکتریایی و ڤایرۆسی کو دبیت ل دویڤ حالەتێن ب ڤی ڕەنگی پەیدا ببن.